Шаргалжуут – Сарлагийн буян нөхөрлөл нь Герман-Монгол-Тайланд 3 улсын хамтран хэрэгжүүлж буй “Монгол улсын тогтвортой аялал жуулчлал, хүртээмжтэй эдийн засаг” төслийн хүрээнд Баянхонгор аймагт загвар НИТАЖ болгон хөгжүүлэхээр зорьж буй нөхөрлөл юм. Тус нөхөрлөл нь 2018 онд  8 өрхийн 13 гишүүнтэйгээр байгуулагдсан. Нөхөрлөлийн ахлагчаар Шаргалжуут тосгоны иргэн Э.Алтанцэцэг, менежерээр Д.Батсайхан нар ажиллаж байна. Нөхөрлөлийн гишүүд нь малчин, тогооч, нягтлан, мужаан, дархан, аяллын менежер, худалдагч гэх мэт төрөл бүрийн мэргэжилтэй.

Шаргалжуут Сарлагийн буян нөхөрлөл нь Баянхонгор аймгийн Баянхонгор сумын Шаргалжуут тосгонд байрлаж, дэлхийд хосгүй +96  хэмийн халуун рашаан бүхий Шаргалжуутын рашааныг түшиглэн аялал жуулчлалын үйл ажиллагаа эрхэлдэг.

Нөхөрлөл нь жуулчдын хүсэл сонирхол хэрэгцээнд тулгуурлан, хагас өдрийн, бүтэн өдрийн, 2 хоногийн болон 3-7 хоногийн аяллын хөтөлбөрийг санал болгож үйлчилдэг. Аяллын хөтөлбөрт:

• Малчин ахуй амьдрал, тэр дундаа хангай нутгийн малчны амьдралтай танилцах
• Сарлаг саах
• Сарлаг унах
• Сарлагт гэр ачих
• Улирлын онцлогтойгоор сарлаг самнах
• Гэр барих
• Аргал түүх
• Мал бэлчээх
• Малчин айлд монгол үндэсний хоол, цай хийх
• Цагаан идээ боловсруулах, тогоо нэрэх
• Эсгий, сураар гар урлалын зүйлс хийх
• Ардын уламжлалт тоглоом наадгай тоглох
• Орон нутгийн онцлог бүхий “Дуутай хуруу” наадгайг үзүүлж сонирхуулах
• 108 төрлийн өвчнийг анагаах увидастай, Шаргалжуутын 108 төрлийн халуун, хүйтэн рашаантай танилцах
• Шаргалжуут рашааны түүх домогтой танилцах
• Шаргалжуут орчмын байгалийн үзэсгэлэнт газруудтай танилцах
• Явган аялал хийх, ан амьтан ажиглах